Од разводната парница поминаа неколку месеци. Сè уште не ви се верува дека се враќате во празен стан и дека не мора да брзате со готвење, перење и сите обврски што паѓаа на ваш грб. Да, има денови кога ви недостига тоа и кога бришете прав за да не се почувствувате осамено, но кога ќе се сетите на деновите исполнети со плач и кавги, знаете дека одлуката за развод сепак беше на место.
Каков е вашиот став за излегување со нови луѓе? Тука не мислиме на пријателките, туку на можноста да најдете нова љубов, да почнете нов живот со нов човек. Можеби мислите дека вие завршивте со тоа, но ние не сакаме да мислиме така. На тие што сè уште патат, им оставаме време, на тие што се решени да одат напред, им велиме браво, а на тие што се во недоумица им го велиме следново:
НА ГЛАС КАЖЕТЕ Ѝ ДА НА ЉУБОВТА!
Осамена сте иако имате кандидати. Се чувствувате убаво во своја кожа, задоволна сте од својот изглед и покрај доживеаниот стрес. Нормално е да посакувате човек покрај себе што ќе знае да ве цени и да го истакне убавото во вас. Зошто ја криете таа желба пред другите. Кажете ја на глас за да ја чуе целиот универзум, само така ќе дојдете до нејзиното остварување.
НЕ ВОДЕТЕ СЕ СПОРЕД ОЗБОРУВАЊАТА!
Се плашите од прстот на сосетката, а сами знаете дека таа не е ништо подобра од вас. Секој човек има свои слабости со кои не се гордее. Всушност, нема ни потреба од споредба. Никој утре нема да ви даде пехар за тоа што одлучивте целиот живот да го поминете сама. Ако на крајот испадне така, тогаш вие не сте ништо подобра од соседите од кои се жалите целиот живот. Излегува дека мислите исто како нив штом го почитувате нивното мислење.
РАЗГОВАРАЈТЕ СО ДЕЦАТА!
Ни се чини дека единствено објаснување им должите на децата, на никој друг. Повеќе од јасно е дека тие ви ја даваат смислата на животот и нема зошто тоа да го негираме овде. Затоа велиме дека не треба да бегате од нивното мислење. Соочете се со нив, не правете им го тоа зад грб, освен ако се работи за минлива авантура. Не сакате утре да ви кажат дека нивното другарче од училиште ве видело со некој чичко.
СООПШТЕТЕ МУ ЈА ВЕСТА НА БИВШИОТ СОПРУГ!
Знаете како велат, чувајте ги пријателите блиску, а непријателите уште поблиску. Многу подобра опција за вас и за децата е да имате добри односи со нивниот татко. Не само за да ви осигура финансиска поткрепа туку и за морално да ве поддржи. Многу често се случува разведените родители да ги трујат децата за едниот родител. Зошто тој да почне да им зборува на децата дека вие сте лоша мајка и дека веднаш потрчавте да најдете негова замена. Вклучувајте го во сите одлуки како и претходно и кажувајте му до каде сте со приватниот живот за да ви излезе во пресрет.
