Бидејќи немавте проблем со искреноста додека патевте, нема причина зошто да се стегате сега кога конечно среќата ви е пред носот
Се уште е во моите мисли, се уште копнеам во сон да го видам неговиот лик. Деновите за мене станаа пекол, а ноќите рај бидејќи само тогаш можев да се надевам дека повторно ќе дојде да ме посети во сон. Знаев дека погрешно постапувам, особено во деновите кога бев премногу слаба дури да го гушнам своето дете. Работите мораа да се сменат бидејќи чувствував како се превртува во гроб од мојата негрижа за неговото единствено чедо...
Оттогаш поминаа 5 години, денес можам да се наречам успешна самохрана мајка на 14 годишно момче. Тој се уште ни фали, но со синот направивме тим и решивме дека ќе го направиме животот убав.
Во статиите за љубов, секс, врски...сретнав совет дека хобито е добар начин за лекување на болката. Мојата загуба решив да ја ублажам со посета на курс по француски јазик. Отсекогаш имав желба да научам уште некој јазик, а посовршено време за тоа од ова немаше. Сега си велам камо да се одлучев за часови по сликање или пилатес. Да не беше проклетиот курс немаше да се најдам пред дилемата дали да го срушам мирот на мојот син и да му кажам дека сретнав некој...
Габриела Митревска (39)
Денес тешко се склопуваат парови, а уште потешко им е на оние што веќе еднаш биле во заедница, да поминуваат низ истото од почеток. Сингл родителите ќе се согласат, запознавањето не е ништо во споредба со соочување со децата.
Стравот од замена, осаменост, лош очув, озборување... за вас потполно неосновани, но за децата сосема логични. Не водете битка за тоа кој е во право, едноставно направете конекција со нивните стравови. Така несомнено ќе им помогнете да се соочат со нив, а победата ќе биде заедничка.
ИСКРЕНА КАКО И СЕКОГАШ
Бидејќи немавте проблем со искреноста додека патевте, нема причина зошто да се стегате сега кога конечно среќата ви е пред носот. Седнете и раскажете му на вашето дете како се запознавте со вашиот пријател. Приказната нека носи порака дека романсата е храна за човекот. Детето несомнено ќе ја цени искреноста и нема да сака да биде причина за вашата осаменост.
И ОВОЈ ПАТ ЉУБОПИТНА ЗА ДЕТСКИТЕ ЧУВСТВА
Прашајте го вашето чедо што мисли за тоа неговата мајка да почне да излегува на состаноци. Големи се шансите дека тоа ќе сака да ве види среќни после лошото минато. На децата им е јасно дека секој сака прегратка и бакнеж - дури и мама. Доколку не се согласува, дајте му време да се навикне на идејата, не вршете му притисок.
ПОТСЕТУВАЊЕ ЗА МАЈЧИНСКИОТ ЗАВЕТ
Потсетете го вашето дете дека промената во вашиот живот нема да значи и промена на односот. Децата најчесто се противат на ваквите врски од страв дека новодојдениот ќе го разниша мајчинскиот интерес. Тетовирајте го во неговиот мозок фактот дека вашата љубов за него е безусловна и неспоредлива.
