На глас кажете дека немате сопруг, но дека имате прекрасни дечиња со кои се гордеете.
Лекувањето после развод е едно долго патување за кое треба време и труд. Но, штом стигнете до моментот кога ќе можете со сигурност да потврдите дека сте ја затвориле таа врата од животот, тогаш ќе видите дека се наоѓате на едно прекрасно место каде што има уште многу љубов, пријателства, среќни моменти...
Разберете дека немате време да живеете како огорчена жена која не успеала да издржи во брачната заедница. Ако другите немаат запишано во досието дека се разведени, не значи дека имаат повеќе право од вас да бидат среќни. Стресот, јавното понижување, стравот од иднината, финансиската несигурност, се е тоа состојба на умот која сами можете да ја промените.
Подарувајте си подароци
Тој постојано ми купуваше подароци, по некогаш и без повод...тој не можеше да го запамети датумот на мојот роденден, не знаеше дека еден букет цвеќе е доволен за да се почувствувам како жена! Има ли потреба да се навраќате на ова? Нормално дека нема, оставете како што било. Од сега вие сте одговорна за подароците. Имате целосно право да се наградувате себе си за секое добро дело. За почеток купете си награда за храброста што ја покажавте во преживувањето на болното искуство. Дали тоа ќе биде нов парфем, парче облека, или карта за кино... сеедно, само овој пат нека биде за лично задоволство, заборавете на другите.
Не срамете се од статусот, РАЗВЕДЕНА
Ќе се согласите дека затворањето далеку од јавноста не е паметен потег. За почеток кафето со пријателките е сосема доволно. Башка никој не очекува од вас да се премажите или да барате нов татко за своите деца. Кога ќе почнете да излегувате на состаноци зависи само од вас. Но, кога веќе решивте да се мешате со останатите сингл мажи во градот, не срамете се од вашиот статус на разведена жена. Вашата ситуација наложува искрена игра. Затоа на глас кажете дека немате сопруг, но дека имате прекрасни дечиња со кои се гордеете.
Најдете си сопствено прибежиште
Понекогаш и пријателките не се доволни за да се ослободите од мислите во главата и чувството во срцето. Не се форсирајте по секоја цена да излегувате кога гледате дека тоа не носи никаков ефект. Колку и да сакате тагата нема да можете да ја прескокнете. Затоа дајте си време. За почеток пробајте со нешто што знае да ве опушти. Почнете да одите на јога, прочитајте ги книгите за кои никогаш немавте време, отпуштете се со топла купка и добра песна. Читајќи ја книгата, стигнавте до делот кога двајцата заљубени се земаа, тоа ве потсети на денот на вашата свадба. Оставете ги солзите да течат, не ги потиснувајте емоциите, слободно сеќавајте се на убавите моменти со него и тие се дел од вашиот живот.
Разговарајте со жената со истата судбина
Самоанализата, разговорот со пријателките, разговорот со постарите, се е тоа во ред, но во никој случај не може да се спореди со разговорот со искусните. Нормално дека сите се во функција да ви помогнат да се соочите со неуспехот, но само вистински ќе ве сфати жената која се борела со истото чувство. Закачете се на нет, постојат толку многу форуми каде ќе можете да размените мислење со илјадници жени како вас. Бидете таа што ќе покрене иницијатива да се состанете и да формирате група преку која ќе им помагате на новите случаи. Самиот факт дека делите иста судбина, ќе направи посмело да чекорите во иднина.
Вратете се во времето кога бевте девојка
Можеби е време да ги извадите старите фото албуми од под кревет. Најдете ја онаа омилена слика кога бевте на летување со пријателките. Навратете се на деновите кога вистински знаевте да уживате во животот и кога требаше малку за да бидете среќна. Внесете ја токму таа свежина во сегашната ситуација. Бидете отворена за комуникација и радувајте се и на обичниот ручек со децата. Одвојте си дел од времето само за себе, негувајте се и дотерувајте се, дозволете си било каков третман. Имајте на ум дека љубовта не завршила со вас.
