NotForMen

Седнати во дворот на благото априлско сонце 2 жени кои помалку си наликуваат, но ги делат педесетина години и стотина светови меѓу нив си ги раскажуваат животните мудрости или подобро кажано едната ја учи другата. Вие го впивате секој збор од вашата баба, а таа со секој нареден ви пренесува одново и одново години искуство, денови болка, денови радост, а наедно непроценлива животна мудрост.

Родена во минатиот век таа е сведоштво за минатите времиња, тогашниот начин на живот, но сепак истите борби, двоумења и слатки маки како и денес што ги имате вие. Еве ја мудроста на баба ми во 4 реда:

„Да шеташ внучке, од дома седење фајде нема“

Ви раскажува со милозвучен глас жената која го почувствувала вкусот на животот, оној слаткиот, но и оној горчливиот. Говори за нејзините ноќни „лудувања“ на корзото и на игранките.

Десет часот беше часот кога морав да го поминам куќниот праг, а многу ора на игранката и не беа многу за пофалби. Во прангите на цврстиот патријархат балканската ќерка не смее многу момчиња да фати за рака, за градот да не ја жигоса за „блудница“ и потоа да остане стара мома. Никој не зема жигосана, само чистите моми влегуваа во добри фамилии. Ама ти шетај, на 50 години нема да ти се шета, а на 70 години нозете нема да те држат.

„Да си пробаш, никој фала не ти кажува ако го чекаш сама на игранка“

И бабите имаа симпатии, љубимци... но се што можеа едвај да допрат беше мажот одбран од стројници. Некои со помалку среќа, како нејзината пријателка која налетала на маж со еден тестис и цел живот покрај на брак без љубов била осудена и на живот без деца, некои со повеќе како неа која сепак ја фрлиле во прегратката на добар човек па изродила и деца и внуци и чека од вас правнуци.

Држи го бабе за рака, но кога ќе почувствуваш дека тој е вистинскиот да си пробаш, да си видиш затоа што и тоа е важно во животот. Не како нас слепци што не држеа. Пробај си, види си, уживај си ама не менувај многу!

„Домаќинка да бидеш, преку стомакот до срцето“

Да си готвиш... Средена трпеза со топол ручек, со супа, па и салата е внимание за мажот. Заслужил тој, работел цел ден, можеби си работела и ти ама сепак жена си, работа ти е. Зготви ручек, а тој ќе исцепи дрва. Модерните времиња ве заведуваат по ресторани, брза храна и слично ама сепак богатата трпеза е симбол на хармонична, здрава фамилија со цврсти меѓусебни врски.

„Децата да си гледаш, куќата да си чуваш ама и фризура да си правиш“

Домаќинка да се биде е важно, но и да се биде убава за него е важно.

Да го заведуваш мажот, а не да потпишеш во матично и да заборавиш на карминчето. На свежо да му мирисаш, на убаво да го асоцираш, на „грев“ да го тераш зошто маж ти е и таква е брачната обврска.

Денес по швалерки тргнаа, ти биди му и дама и домаќинка, и жена и швалерка,  и скромна и развратна, но само негова. Чувај го мажот, слушај го, маж е тој!