.gif)
Самата знае и верува дека е одличен пакет на младост, убавина, интелигенција и шарм, па со таа енергија ги заразува и мажите околу неа.
На миг можеби и вие сте се запрашале што е тоа што вашата пријателка ја прави магнет за припадниците на машкиот пол.. Да, изгледа добро, но и вие изгледате одлично, можеби дури и подобро од неа, а сепак вашата палета на момчиња е многу посиромашна. Поседува нешто што прави мажите да се лепат за неа, а штом и се приближат, заминувањето од неа е последното нешто што може да им падне на ум.
Или пак ситуацијата е обратна и токму вие сте таа заводничка во друштвото? Ајде да откриеме која e магијата на моќната жена!
Забавна
Таа знае да разговара на секоја тема. Не е плитка и површна „дама" на која чевлите и се животен двигател. Да, ги сака нив, сака шопинг, но ја интересира и најновата театарска претстава или пак нафтената криза која го тресе светот. Сака да се дружи со различен тип на луѓе кои не ги бира според надворешниот изглед или факултетската диплома туку според нивниот карактер и заедничките интереси кои ги делат.
Самоуверена
Дури и да не е најубавата жена на светот, таа секогаш изгледа сосема пристојно и средено. Вешто знае да ги истакне своите позитивни страни и да привлече многу погледи на себе со својата појава и благ заводнички поглед. Чекори самоуверено, свесна за своите квалитети. Самата знае и верува дека е одличен пакет на младост, убавина, интелигенција и шарм, па со таа енергија ги заразува и мажите околу неа.
Релаксирана
Знае да ужива во многуте благодети кои ги нуди животот. На неа не и е проблем во некоја ситуација да седне на нечист бетон и не прави сцена кога ќе и се скинат новите хулахопки. Има многу пријатели и обожава да се дружи со нив дури и по цена некогаш да го остави момчето во втор план. Тој не е предуслов за нејзината забава или пак диктатор на нејзиниот животен распоред.
Воздржана
Не е тип на девојка која има неконтролирани испади на љубомора. Самоконтролата е нејзина јака страна и знае да се носи со секоја ситуација. Љубомората е неодминлив дел од врската каде што постои љубов, но да се сведе таа на минимум или пак барем да се контролира и рационално да се размисли пред да се предизвика кавга со драмска кулминација е одлика на малку девојки.
Умерена
Таа го сака своето момче, но не оди наоколу да раскажува за својата розова врска. Делата и се многу поважни од зборовите. Не кажува „те сакам" 20 пати во денот, а тоа го прави само кога вистински ќе го почувствува и кога таа ќе посака. Сака да поминува време со него, но го остава слободно да дише и да поминува време со неговите пријатели. Сонува еден ден за олтар и бел фустан, но во свое време и со тој вистинскиот, а на останатите попатни не им ја споменува оваа тема.
Решителна
Цврсто стои на своите ставови. Некогаш знае свесно да влезе во расправија со својот партнер бранејќи го својот став до крај. Го почитува неговото мислење, но нејзиното е најважно за да одлучи каде да пресече. Не трпи неправди и омаловажувања. Да биде почитувана и ценета е основен предуслов за некој да биде покрај неа. Нејзината, а не неговата желба е нејзина заповед.
Амбициозна
Таа не е среќна кога ќе се пофали дека нејзиниот партнер е директор во некоја компанија, туку кога ќе каже дека таа е магистер на економски студии и работи во одделот финансиски ресурси во таа и таа компанија на пример. Знае што сака во животот и самостојно се бори за тоа. Нејзин работодавец не е нејзиниот татко, а само со сопствениот квалитет го достигнала нивото на кое што се наоѓа денес. Задоволна од сама себе таа е полна со позитивна енергија која зрачи при секој разговор. Па кој не би посакал таква жена?
Едно големо ДА за моќна жена, која покрај семејство сака и кариера, која првенствено се радува на своите успеси, а потоа на неговите, знае да се забавува и да ужива во животот свесна дека е сакана или посакувана.
Дали мислите дека треба да сте моќна за да бидете посакувана?
-
Разголете се емотивно, милувајте се и гледајте се во очи за да ви се спојат и душите. ... -
Можеби е вашиот партнер, можеби е пријателката, можеби е колешката од работа... ... -
Често перфекционистите се несреќни, но уште почесто токму тие се оние најуспешните. ...
.gif)
