.gif)
Пред вас светка екранчето со малите црни буквички, а сето двоумење дали да притиснете „send“ завршува кога ќе ја чуете бурната поддршка од пријателките.
Ах таа слатка сабота… Без ниту една работна обврска вечерва ќе се опуштите после стресната работна недела. Кога само ќе помислите на утрото потоа, поминато во вашата постелнина, срцето ви заигрува од среќа. Пријателките и алкохолот се неминовно залевање на атмосферата, а дестинацијата потоа ја одредува моменталното расположение.
Време за акција
Вечерта полека тече, разговорите како Вруток извираат, а најскриените тајни остануваат голи во кругот на најблиските пијани пријателки. Дури и емотивно најнедостапните пријателки, започнуваат живописно да ја опишуваат драмата со поранешните момчиња.
И стоп! Штом се спомне овој поим ете го проклетството наречено СМС порака. Се фаќате за мобилниот телефон и за миг се претворате во најспретната дактилографка. Пред вас светка екранчето со малите црни буквички, а сето двоумење дали да притиснете „send“ завршува кога ќе ја чуете бурната поддршка од пријателките дека животот е еден и треба да го сторите тоа што го сакате. И на сцената настапува забрането СМС сценарио.
Првите десетина минути нетрпеливо ја отворате чантата и го острите слухот да го чуете сигналот за новопристигнатата порака.
Ако тоа се случи на вашето лице имате насмевка од шестка до шестка, но и во спротивно тоа не е патоказ кон лошо помината ноќ бидејќи комбинацијата од пријателки и алкохол многу набргу ви го одзема вниманието, а вие се смеете за црвениот кок на сосетката или на црвениот фустан со зелени монисти и мрежестите хулахопки на девојката која во тој миг поминува покрај вас. Дека вечерта ќе биде одлична е повеќе од сигурно, но денот потоа и сандачето со име „outbox“ е она кое ви ја крева косата.
Дали во виното е вистината или во алкохолот е глупоста, заклучувате следното утро во зависност од тоа дали сте добиле одговор на пораката и каков бил истиот.
Доказите за вашата пијана ноќ ги крие токму таа мала направа, која изминатата ноќ ве наведе на грев. Со брзина на светлината ја бришете пораката и слатко или помалку слатко се смеете на вашите дела.
Ако се нервирате помислете само дека луди младешки спомени се нижат како бисери во вашето животно досие, па зарем има нешто лошо во тоа?
Лек за ситуацијата?
Но сепак следниот пат кога ќе планирате жестока „lady’s night“ оставете го мобилниот телефон дома или како мерка на претпазливост избришете неколку броеви од телефонскиот именик (ова нормално нема да ви помогне ако тие се врежани во вашата глава).
Затоа ако мобилниот е неопходоност од која не можете да се откажете оваа ноќ, тогаш предупредете ги вашите пријателки уште пред забавата да започне да го зема својот арач дека вечерва не е дозволено да ве поддржат во ниту една љубовна акција.
На секоја ваша идеја за љубов преку жица или преку СМС нека одговорат со одлучно „не“ и во име на пријателството нека ве спасат од утрешните главоболки и јадови.
-
Разголете се емотивно, милувајте се и гледајте се во очи за да ви се спојат и душите. ... -
Можеби е вашиот партнер, можеби е пријателката, можеби е колешката од работа... ... -
Често перфекционистите се несреќни, но уште почесто токму тие се оние најуспешните. ...
.gif)
