Не треба да нé зачудува фактот што кај нас се зголемува бројот на парови од различни вери, со оглед на тоа што живееме во мултиетничко општество. Ваквата појава во светот е нормална и речиси прифатена. Но, дали кај нас може ваква врска да опстане? Да се почитуваат разликите и да се живее под лупата на јавноста и злобните коментари?
Во минатото можеби и ќе кажевме дека нема шанси за таква врска да преживее, но денес кога луѓето се европски настроени, често патуваат, се поврзуваат со луѓето во светот... ,тогаш постојат и реални шанси за успех.
Секому може да му се случи да се заљуби во човек од друга раса, вера и националност. Нема потреба да се навраќаме на природната хемија. Колку и да сакаме, не сме во состојба да го контролираме центарот одговорен за привлекување на спротивниот пол. Да, можеме свесно да си забраниме дека нема да имаме ништо со човекот, но во никој случај не можеме да ги запреме чувствата.
Треба да бидете свесни дека влегувањето во таква врска носи голема одговорност и носење тешки одлуки. Секако дека ќе се обидете да се советувате со пријателките и блиските, но сепак одлуката треба да биде ваша. Вие сте таа што е дел од врската, таа што ќе се соочува со непријатните моменти, таа што ќе треба да им објасни на родителите.
Врската помалку или повеќе значи истражување и пронаоѓање карактер сличен на вашиот. Тука се мисли на заедничкиот поглед на свет, заеднички верувања, слична визија за иднината. Некој со кого ќе можете да се споите како на емоционално така и на физичко ниво. А кога зборуваме за заеднички верувања, не мислиме на ист бог, туку на моралните вредности.
Ако чувствувате добри вибрации и длабока конекција, тогаш не треба ништо да ви застане на патот. Сепак, и тука има едно големо но. Ништо од конекцијата ако вие стоите на ставот дека ќе го убедите да ја смени верата. Тука сте се осудиле на пропаст. Ако сакате да бидете со човекот, мора да ги почитувате и да го прифатите заедно со неговите верски определби.
За крај, иако можеби треба да стои на почеток, потребна ви е голема храброст. Бидете упорни да ја истерате работата до крај бидејќи ве очекуваат многу сопки. Влијанието на другите луѓе може непријатно да ве изненади. Среќата може да исчезне за час ако некој реши посериозно да се занимава да ја уништи.
