„Признавањето дека сум била со негов другар не е за да ми ги прости гревовите, туку за да нема тајни меѓу нас.“
„Имав момче 3 години. Бевме неразделни. Едно лето, кога се вративме од одмор, се скаравме толку многу што раскинавме. И двајцата сме тврдоглави и никој не попушти. Претпоставувам, се надевавме дека другиот ќе се јави прв. Бев толку горда и не попуштав. Поминаа неколку месеци и едноставно се откажав зошто мислев дека престанал да ме сака. После една година и 5 месеци се смиривме. Поубаво ни е од било кога. Но, постојано ме мачи тоа што додека не бевме заедно, јас се гледав со неговиот најдобар другар. Сакам да му кажам за тоа зошто не сакам да кријам работи од него, но се плашам да не го повредам и изгубам засекогаш."
Прилично комплексна тема. Но, секој различно размислува на оваа тема и различно би постапил. Ова се мислењата на момчињата и девојките конкретно за оваа ситуација.
МОМЧИЊА
Мнозинството момчиња велат дека доколку се најдат во ваква ситуација, би се чувствувале многу подобро ако девојките премолчат. Секако, само ако девојките нема да го направат истото и ако се сигурни дека другарот нема да им каже.
„И двајцата сте правеле грешки додека не сте биле заедно. Токму тие ви ги споиле повторно патиштата. Признанието дека сте биле со неговиот другар само може да ви ја уништи врската и никогаш повеќе да не ви верува. На пример, јас да знам дека мојот пријател ја видел девојка ми гола може многу лошо да влијае на мојата психа. Тоа не е случај само со мене, туку со сите машки." - Горан, 24.
„Признавањето на ваква работа се случува само за да се чувствува девојката подобро. Да нема повеќе грижа на совест. Со тоа нема да се подобрат работите. Само повеќе ќе ме повреди и целата работа ќе дојде до раскинување." - Андреј, 23.
„Каков е тој „пријател" што спие со поранешната девојка на неговиот најверен другар? Каков дибек! Мислам дека девојката треба да ги разјасни тие работи со другарот, да се договорат никогаш да не кажат ништо за тоа. Не би сакал после извесно време љубоморниот пријател да сака да ми ја расипе врската. Тоа што не го знам нема да ме убие." - Тодор, 29.
ДЕВОЈКИ
Девојките велат дека штом раскинеш со некое момче, добра одмазда се неговите другари, но ова не секогаш е точно. Штом сте решиле повторно да бидете заедно, значи дека сте размислиле што сакате еден од друг и сте сфатиле дека сакате да продолжите. Затоа треба да признаете што сте направиле. Признанието ќе биде тешко, но е само почеток кој води до убави работи. Треба да се надминат лошите работи во врската за да следат убавите.
„Искрено, ако сме биле разделени година и пол, тоа не е негова работа што сум правела и со кој. Но, признавањето дека сум била со негов другар не е за да ми ги прости гревовите, туку за да нема тајни меѓу нас. Ваквите работи секогаш излегуваат на виделина. Мислам дека повеќе ќе биде повреден ако дознае од трета личност отколку од мене. Би била искрена до крај со него, макар тоа да значи дека ќе го загубам. Барем толку заслужил." - Ирена, 27.
„Не сакам секогаш да бидам вознемирена кога ќе ми каже „Може да поразговараме?". или пак кога ќе биде излезен со друштвото, во кое е и дотичниот, да се грижам да не се опијат и да му признае. Ќе му кажам и ќе најдеме заедничко решение." - Елена, 25. „Јас би му кажала на другарот што планирам да направам и ќе му кажам на моето момче се што се случило. Нормално нема да навлегувам во детали. Ќе пробам да му објаснам дека сум направила работи со кои не се гордеам, но дека го почитувам и дека ќе направам се за да бидам со него. Нема да се вадам со клишето „Ама бевме на пауза!" Можам само да се надевам дека по првичниот шок ќе сфати дека станува збор за искреност и почит кон него." - Ана, 28.
Што би направиле вие во ваква ситуација? Би му признале ли на вашето момче дека сте биле со неговиот најдобар другар?
