NotForMen

Нормално е партнерот да се плаши да ве запознае со пријателите. Тоа и не треба толку да ве загрижува бидејќи опасно е ако не се плаши. Тоа значи дека не сте му толку важна и сеедно му е каков впечаток ќе оставите на нив или тие на вас, бидејќи и онака не планира ништо сериозно.

Еве што ни одговорија момците кога ги прашавме колку ги плаши првата средба:

Благоја (26): „Првата средба ни најмалку не ме загрижува, бидејќи ако зборуваме за вистински другари, тие треба да го почитуваат мојот избор и вкус."

Иван (24): „Моите пријатели многу кажуваат за тоа каков сум јас, затоа ако не ѝ се допаднат, постои можност и јас да престанам да ѝ се допаѓам. Од друга страна, ако другарите мислат дека таа не е вистинската, колку и да не се согласувам, ќе почнам да ги забележувам маните што ми ги посочиле."

Бобан (27): „Ничие мислење не треба да биде пресудно освен сопственото. Но, работите би биле одлични доколку сите би се согласувале, во спротивно едната страна секогаш ќе страда."

Дали се плашат или не, тие нека му ја мислат. Доволен е за вас притисокот што се трудите да се спријателите и да оставите добар впечаток. Ако тој се сомнева во вашите квалитети поради нечиј коментар, тогаш можеби и не ве заслужува.

Секој има создадено приближна визија за тоа како сака да се одвива првата средба, како да изгледа партнерката, како да се однесува, каде да се одвива запознавањето и слично. Еве што изјавија момците на оваа тема:

Христијан (20): „На првата средба сакам девојка ми да изгледа колку што може поатрактивно, да не биде срамежлива, туку слободно да зборува и да се однесува природно."

Владо (27): „Најмногу се нервирам кога девојките на првата средба одеднаш стануваат нешто што не се. Не знаат да прифатат шега, не се смеат и постојано гледаат во часовникот како да се пред суд. Никој нема намера да ги навреди, шегите се во функција да ги олабават."

Михајло (23): „Ако нешто сум ѝ кажал за некој од моите другари, не значи дека кога ќе ги запознае, треба да го спомене тоа. Некои коментари треба да останат помеѓу нас, а не моите другари да помислат дека им зборувам зад грб."

Лазе (29): „Најчудна ситуација е кога на првата средба некој од другарите ќе дојде со девојка и тие две не разменуваат збор цела вечер. Никогаш не ми било јасно зошто? Дали поставуваат натпревар која ќе биде главна во друштвото? Машките никогаш не го прават тоа, веднаш наоѓаат тема за зборување."

Ивица (27): „Многу е смешно кога ќе ја поканиш девојката да ја запознаеш со другарите на дневно кафе, а таа се појавува со тон пудра, потпетици од 12 см, накит, фустан... Па нема да одиме во дискотека. Отсега кога ќе им се јавувате, потсетете ги како треба да изгледаат."

Заклучокот поедноставен и не може да биде. Правилото е просто, бидете спонтана. Ако сте мирна по природа, не форсирајте се да бидете гласна. Ако сте темпераментна и сé ве интересира, интересирајте се. Важно е да го покажете тоа во што се заљубил нивниот пријател.

Сигурно секогаш сте се прашувале што е тоа што неговите пријатели прво го забележуваат кај вас. За да не претпоставуваме, ги прашавме.

Благоја (26): „Дали е атрактивна колку што ја фалеше другар ми."

Ивица (27): „Колку е секси, дали е забавна и дали има убави другарки."

Лазе (29): „Колку е опседната со другар ми бидејќи од тоа зависи колку ќе се дружам со него во иднина. "

Владо (27): „Дали нé гледа со чуден поглед, во смисла колку сте неподносливи."

Сепак и не барале да видат кој знае што. Типични мажи се фаќаат за изгледот и дали ќе имате некоја другарка за местење. Затоа, нека не ве плаши ваквата средба, а за да не се плаши и партнерот, прочитајте му ја статијава.

• 
  Се што сака модерниот маж од една жена!
  Модерниот маж бара доверлива, секси сингл девојка со која може да има долга врска. ...
• 
  „Љубовта е негова религија“
  Владо Јаневски за твоите очи кои матат нечиј ум и за мажот кој сака да ве сретне некогаш и негде повторно. ...
• 
  Зошто жените не ги сакаат добрите момци?
  Сите ние сме имале по еден Aidan и Mr. Big во животот, сме се држеле за рака или сме имале див секс. ...