Дали некогаш сте посакале да бидете маж? Сигурна сум дека Да. Си велите за нив сè е толку поедноставно. Не мора да одиме подалеку, еве да почнеме од дома. За синчето секогаш има посебен третман.
Вие не смеевте да помислите дома да се појавите со слаби оцени или, пак, да излегувате уште од 6. одделение. За автомобил полагавте пред некоја година, тој уште нема наполнето 18 години, а веќе му уплатиле часови.
Ни во сферата на љубовта работите не се нешто поинакви. Да можевте да бидете без чувства, да не се заморувавте со озборувања, ќе ги бркавте најубавите девојки во градот без око да ви трепне што и како ќе биде во иднина.
Зошто секогаш ние сме несфатената страна? Толку ли е тешко да се почитуваат неколку наши барања? Колку е само комплициран женскиот свет. Но, што ако ви кажеме дека можете да ги замените улогите на еден ден. Што е првото нешто што би го сториле како маж?
Додека чекаме на вашите одговори, ве оставаме да се забавувате со нивните:
Роберт (25) Би се скарал со партнерот за да можам сè да му плеснам во фаца. Ретко кој може да надитри жена, секогаш не оставаат со затворена уста.
Мажите одамна заклучиле дека со жена не можат да излезат на крај. Тие можеби се жалат дека премногу зборувате, но всушност страдаат што не може да бидат како вас. Жените секогаш знаат да ги најдат вистинските зборови и во најбаналните ситуации, тоа е тоа што мажите го посакуваат, а го немаат.
Андреја (28) Би натерал некој тип да ме изнесе на вечера за да не мора да потрошам ни денар.
Еве девојки зошто е убаво да сте жени. Ве собираат од пред куќа, ве третираат како принцези и на крај ве враќаат во замокот. И да сте почестиле машко, тоа било еднаш во годината за разлика од нив кои тоа го прават секојдневно.
Јане (24) Кога би бил жена на еден ден, би сакал да видам колку мажи можам да натерам да станат за јас да седнам во автобус или, пак, да ми отворат врата.
Еве ја и втората причина зошто е убаво да се биде жена. Доволно е да облечете пократко здолниште и да им го свртите паметот. Ако треба и да се натоварени со кеси и торби, ќе станат кога ќе се појавите со невината фаца.
Стефан (32) Цел ден би го поминал во спа-центар, само жените знаат да си го допуштат тоа и вистински да уживаат.
Маж никогаш нема да одвои пари за себе, особено за разубавување. Попрво ќе ги потроши парите на пиво или на цигари отколку да појде на релаксирачка масажа. Не е ни чудно што отсекогаш се восхитувале на женската елеганција и на нивната способност да внимаваат на себе.
И девојки, кој е заклучокот за денеска?
Очигледно дека не сме само ние што сакаме смена на улогите. И ние имаме предности што тие ги посакуваат. Најважно од сè е да бидете благодарни што сте жени. Сетете се дека секоја од вас е едно неповторливо суштество. Од вашата улога зависат многу луѓе, всушност целиот универзум.
