Заборавањето на важните датуми и понатаму останува дел од класичните проблеми во врската. Едноставно жените не може да преминат преку фактот дека мажите не можат да го запомнат датумот на нивниот роденден или годишнина.
Тања, 29: Татко ми не знае кога ми е роденден, па камоли сопругот. Како мала многу се лутев. Затоа мајка ми кога ќе дојдеше денот, наутро пред работа, му оставаше писмо за да знае да ми честита кога ќе станам од спиење.
Но, до кога вака? Зар навистина ќе се потврди женското тврдење дека мажите се нечувствителни свињи кои нè сфаќаат здраво за готово? Или можеби боледуваат од генетски наследна болест. И покрај тоа што се доктори, адвокати, професори...просторот во мозокот одреден за паметење на датумите им е осакатен.
Сепак, постои психолошко објаснување и за овој машки феномен. Накратко звучи вака: мажите до толку може да се фокусираат на надворешниот свет што забораваат дека се во врска.
Но, ако за вас врската е цвет што секојдневно има потреба од вода, за нив врската е сигурна зона. Тоа е нивното удобно место од каде што црпат енергија за да се соочат со стресот на работа, да успеат во спортот или да се соочат со новиот предизвик. Кога ќе престанат да мислат дека изворот може да секне, тогаш веќе се заслепени.
Владимир, 24: Толку бев окупиран со Јане од работа да не добие унапредување пред мене, што секој ден се жалев пред девојката, само за тоа зборував и заборавив дека ѝ е роденден.
Саша, 33: На сопругата ѝ ветив вечера по повод првата годишнина од брак. Како за беља тогаш почнаа натпреварите во мал фудбал и јас сосема изгубив чувство за планот.
Чудно е тоа што ваквиот проблем се јавува во долгите врски. На самите почетоци сигурно ви приредувал незаборавни моменти за секој поважен датум, а некогаш и не било потребно да се чека на вашиот роденден. Љубовта ја славевте секој ден.
Психолозите објаснуваат дека како поминува времето, женскиот предизвик станува неинтересен за мажите. Новото хоби е толку силно што е во состојба да направи дупки во неговата, претходно, одлична меморија.
Сè на сè, тоа е толкувањето. Но, не ви врши некоја работа. Читањето не го смени вашиот став. И понатаму не ви се допаѓа што ви честита откако ќе го слушне вашиот разговор со пријателката. Не можете да влијаете на неговиот генетски материјал, но можете да го смените неговото однесување...продолжува!
