NotForMen

И токму кога помисливте дека го најдовте Господин Совршен,а врската ви беше нереално убава се појави проблем. Тој има толку многу особини кои си посакувавте кај својот партнер, но има и една од овие 4 која знае стварно да ве извади од кожа, па дури на моменти да ве натера да помислите за крај, но потоа повторно рационално размислувате и го слушате срцето и останувате покрај својот Господин Совршен. Свесни сте дека премногу барате, а и вие самата сте нормално со многу маани, но оваа негова иритирачка особина ви ги затемнува утрата и вознемирува ноќите.

Не е дружељубив

Тој е убав, образован дечко и со него поминувате незаборавни мигови. Но проблемот е кога ќе излезете со вашето друштво тој наеднаш како да станува срамежлив и повлечен. Молчи поголемиот дел од времето, а речиси секоја тема му е „здодевна“ за да се вклучи во разговорот. Постојано се вади на изговорот дека вашите пријателки не му обрнуваат внимание или дека не може да се забавува заедно со вас бидејќи не е дел од вашата долгогодишна дружба. Од друга страна пак кога ќе споменете да излезете со неговите другари, тие наеднаш стануваат презафатени или пак не може да одбере соодветно место кое би одговарало за двете страни што ве тера да се запрашате и дали воопшто ги има?

Не е амбициозен во животот

Студирал затоа што од дома така му наредиле, работи затоа што вие до вчера го притискавте да најде работа и постојано му велевте дека е единствениот од неговото друштво кој на таа возраст има обврска само да спие до пладне и да гледа па минимум 2 филма на ден за да го пополни времето. Ништо не прави на своја иницијатива, неретко се чувствувате како негова мајка која постојано префрла и негодува за нешто. Па што ако е толку добар и ве држи како капка на дланка, кога вие треба цел живот да бидете генератор на неговите животни случувања? Размислувате дали може да се потпрете на таков човек и дали ако со таков човек основате семејство вие ќе бидете благајник, работник и организатор?

Премногу е љубоморен

Имате прекрасна врска која тврдоглаво како да сака да ја упропасти со своите драми и преувеличувања. Вие сте единствената од вашите пријателки која ретко смее да излезе сама, а кога ќе го сторите тоа телефонот мора да ви биде на маса и да го чуете дури и во најгласното диско и тоа 5 пати во истата вечер. Го кажавте времето на излегување, местото на излегување, имињата на цело друштво (нормално строго жени), а тој сепак најде причина за кавга. Тој е посесивен тип, неговата љубов на моменти ви задава болка и ви снемува воздух во стакленото ѕвоно во кое ве чува, а тој неосетно прави смртен грев за вашата врска.

Лош е во кревет

Го сакате вие, вашите пријателки, па дури и вашите родители се воодушевени од ова убаво, фино, културно и паметно момче. И токму кога рековте конечно најдов се што сакав кај еден маж сфативте дека е лош во кревет. Не многу надарен, мрзоволен и некреативен. Често се фаќате пред спиење како размислувате што ако го поминете целиот живот со него, дали сите други квалитети можат да ја надополнат жртвата за скратеното сексуално задоволство? Се плашите дека оваа негова „ненадареност“ еден ден може да биде главна причина за да потклекнете пред искушението и да посегнете по оргазам од туѓ маж.

Дали вреди да се замижи пред оваа негова иритирачка особина кога тој има се друго што ви е потребно?

Моќта е во несовршеноста да се најде убавината, а несовршените луѓе и љубови се оние вистинските.... Се друго е нереална филмска бајка.