NotForMen

Вие безуспешно со подвиткана опашка после денови докажување се помиривте.

За секое за, тој има против, а за секој ваш став, приговор. Се убедувате и докажувате дури повеќе и од нашиве политичари, а вашите дебати се долги и исцрпувачки. И на крај повторно ќе се предадете, затоа што  знаете дека ако тој смета дека сонцето е зелено, ништо и никој не може да му докаже дека тоа е жолто.

Различни ставови во животот

Ајде за некои животни прашања и општи ставови некако и ќе проголтате, ќе си помислите дека и не мора за се во животот да се согласувате, ама кога се работи за вашата врска е тука е веќе шлагот на оваа помалку солена торта.

Несогласувања во врската

Постојано му велите да не започнува расправија пред вашите пријатели, а тој без влакна на јазикот ќе започне да ви префрла за нешто пред нив како да сте сами на пуст остров. Се карате пред нив, вие се чувствувате крајно непријатно, а исто така и тие, случајни учесници кои сакале само да си поминат убаво во вашето друштво, а добиле сочни детали од вашиот интимен живот на пример. Уште ако сето ова се зачини со вашите солзи е тогаш веќе станува драма која долго ќе се прераскажува во вашето друштво.

Вие двајца можеби утре ќе се помирите и за миг ќе го заборавите ова, но тие сигурно ќе го паметат уште неколку месеци потоа.

Безуспешни лекции

Токму поради ова постојано му велите да го држи јазикот зад забите се додека не отидете дома или пак сте некаде сами и на мир да дискутирате за вашите проблеми, но тој упорно, со тврдоглавоста на најголемото магаре, тврди дека не му е важно туѓото мислење, дека само тој треба да ви биде важно што мисли и да не драматизирате залудно.

Вие безуспешно со подвиткана опашка после денови докажување се помиривте со оваа судбина.

Но трагедијата е што не е само ова несогласување, оваа листа е долга, а вам од ден на ден фитилот ви е се пократок.

Но кога сте се фатиле на орото ќе мора да го играте, па така обидете се да го прифатите овој карактер, бидејќи тоа е единствениот начин да функционирате покрај него. Дишете длабоко, научете да броите до 10 и никако немојте да дозволите и вас да ве зарази тврдоглавоста, бидејќи тогаш се што ќе остане од вашата некогаш распламтена љубов, ќе биде црн пепел.