Како сега да ја преживеете ноќта? Толку време го немавте видено и сега кога добивте можност, тој се додворува на друга! Под дејство на љубомората во глава ви се вртат само лоши сценарија. Си замислувате како на девојката ѝ удирате шише од глава. Нормално дека мора да се воздржите и да останете дама до крај.
А како всушност сé се случи?
До пред неколку дена вие бевте најзаљубената девојка во градот. Мислевте дека другите ви завидуваат на вашата врска, особено кога ќе кажевте со кој убавец го делите креветот. Ни сама не знаете како, но почнавте да се будите сама. Причината зошто тоа се случи, сé уште не ви е позната бидејќи никогаш не ја добивте.
Можеби и затоа сé уште се надевате дека ќе се врати. Иако не ви се јавува, и кога го видовте само ви крена рака како на познаник, вие упорно сметате дека тоа што е потребно е една вистинска средба насамо и сé да биде како порано. Всушност, тоа беше и причината за излегувањето, да го сретнете него. И што кога го видовте тоа што ни на сон не го помислувавте?
Претпоставувате дека нашите совети нема да бидат ниту малку поврзани со шише или каков било предмет што може да ви се најде при рака. Тоа од што треба да тргнете е да заборавите на идејата дека вие привремено не сте заедно, патем сторете го и ова:
Не излегувајте за него! Најголемата грешка девојките ја прават кога излегуваат за цела вечер да ја поминат во следење, набљудување отстрана, демнење... Со тоа не добивате ништо! Ниту шанса да се смирите, ниту шанса да го зборавите ниту шанса повторно да му станете интересна. Само ќе станете ДАВЕЖ од кој нема спас. Излегувајте за да си поминете убаво со пријателите, сé останато нека биде споредно.
Не натпреварувајте се со другите девојки! Кога ќе го видете со друга, не правете ја стандардната процедура на споредување. Ако е подобра од вас, тоа значи дека имал право што ве оставил, но ако не е, тогаш навистина ве понижува. Ова е сосема погрешно верување. Девојките со кои стои не се мерило за вашата врска, а уште помалку за вас.
Не распрашувајте се каде, кога, со кого го виделе! Заборавете на вообичаените прашања за тоа што прави во слободното време. Сосредеоточете се како ќе го поминете своето време и дали можеби треба да ја прифатите поканата за кафе. Се лажете ако мислите дека ваквите информации ќе ви помогнат да го заборавите. Само ќе станете опседната со него и тоа ќе нема крај.
Не обидувајте се да предизвикате љубомора! Си правите голема штета на идниот љубовен живот ако разговорите со другите момци ги предизвикувате за да го направите љубоморен. Вие сте таа што пати и што се бори за него, затоа ваква постапка може да запали кај некој во ваша положба.
Не живејте го животот за него! Новата фризура, комбинацијата, шминката, очајно говорат дека сакате да го привлечете неговото внимание. Нели мислите дека доволно ве познава и дека ве има видено во секакво светло? Немојте да мислите дека со својата појава ќе му покажете што пропушта. Ако тој расчистил со тоа, залудни се сите ваши нерви потрошени пред огледало.
