Чешлањето на косата додека е водена предизвикува кршење на влакното
Со оглед на тоа што денес постојат навистина многу производи за нега на косата, некогашниот принцип на миење со шампон и вода се смени. Миењето на косата стана доста сложена процедура.
СОВРЕМЕНА НЕГА ЗА КОСА:
- Нанесување специјален шампон соодветен за типот на коса.
- Нанесување регенератор.
- Нанесување серум на врвовите.
- Прскање на косата со спреј за сјај.
- Нанесување серум за подигнување на косата од коренот.
- Еднаш во неделата нанесување на маска.
- Обликување на фризурата со лак или гел.
- Еднаш месечно нанесување ампула за коса.
- Пена за виткање на косата.
Ова отприлика се производите со кои денес располагаме. Дали можеби се премногу за косата? Дали тие се причината што денес многу девојки имаат проблем со опаѓање на косата? Едно е сигурно - косите станаа нежни и кршливи, ретко која девојка располага со квалитетна коса.
Но тоа не е случај со девојките од муслиманска вероисповед, тие се уште можат да се пофалат со своите долги и квалитетни коси. Можеби имаат некоја тајна што не ја откриваат, но сепак традиционалната нега и производите на природна база се нивното најголемо оружје.
ЧИСТЕЊЕ НА ЧЕТКИТЕ ЗА КОСА
Четките и чешелите најдобро ќе ги исчистите ако претходно ги натопите во вода во која сте ставиле малку амоњак. Оставете ги да стојат во растворот неколку минути, а потоа исплакнете ги со вода.
ТРАДИЦИОНАЛНА НЕГА ЗА КОСА - СОВЕТИ:
Традиционалната нега на косата подразбира миење на косата со шампон, два пати во неделата, и редовно чешлање. Маските, што се исклучиво на природна база, се користат само кога ќе се појави проблем.
Најмногу внимание се обрнува на водата што ја користите за плакнење на косата.
- Ако водата со која ја миете косата е тврда, а и сами знаете дека е, во последната вода за миење ставете една лажичка боракс.
- Последното плакнење на косата правете го со млака вода. Колку е поладна водата толку косата ќе биде посјајна. Внимавајте само на едно, да не настинете.
- Првутот на косата се отстранува со миење со вода во која сте додале малку оцет. Истото можете да го сторите и со рицинусово масло.
- Косата пред миење секогаш чешлајте ја за да не ви се плетка.
- Косата плакнете ја се додека водата не стане бистра.
- Никогаш не сушете ја косата со фен.
- Четките за коса редовно чистете ги од влакна, а повремено чистете ги со алкохол.
ТРЕТМАН НА КОСАТА СО РИЦИНУС
Масирајте го коренот на влакното и кожата на главата со маслото од рицинус. Исчеткајте ја косата и врзете ја во кок, оставете ја така да стои цела ноќ. Следниот ден косата измијте ја со млака дестилирана вода. при последното плакнење додајте во водата малку готварска сол. Рициново масло можете да најдете во секоја аптека, чини околу 50-60 денари.
