Ако спаѓате во групата девојки со нормална кожа, тогаш ви честитаме. Вие немате ни половина работа од останатите девојки кога станува збор за нега на кожата.
Дури ако имате мрсна Т - зона, а суви образи или, пак, кожата ви се менува во зависност од годишното време, па е посува зиме, а помрсна лете, останувате во категоријата нормална кожа.
Како што споменавме, маките ви се намалени, но тоа не значи дека можете да заборавите на кожата. И нормалната кожа има потреба од секојдневна нега. Еве што треба да направите:
Во основната нега на секоја кожа е вклучено миењето на лицето двапати во денот, наутро и пред легнување. Користете нежен тоник кој не предизвикува иритации. Тоникот го освежува лицето, но не е неопходен. Особено избегнувајте го ако содржи алкохол.
За да го одржувате нивото на хидратација, редовно нанесувајте крем. Не експериментирајте и купете си од оние наменети за нормална кожа. Единствено на што треба да обрнете внимание е УВ-факторот. Гледајте кремот да содржи барем 10 СПФ-фактор.
Маските за лице се одлични за кожата бидејќи ѝ помагаат да се соочи со надворешните услови, како промена на времето и големото загадување. Доволно е да ги нанесувате еднаш во неделата или барем на секои две недели.
Еднаш во месецот практикувајте пилинг за да се ослободите од непотребниот слој на мртвите клетки. Сепак, со нормалната кожа не смее да се претерува. Ако кожата ја навикнете на чест пилинг, таа ќе стане зависна од тоа, а ризикувате да ѝ нанесете и трајна штета.
Тоа што треба да го запомните е дека за кожата да изгледа убаво и блескаво потребно е да пиете вода и да консумирате свежа храна, особено овошје и зеленчук.
