Без разлика од кој аспект гледате, бременоста е една голема промена. Промените нема да ги забележите само на вагата, тие се неизбежни и за кожата. За да се ослободите од нив, треба да им пристапите правилно.
Рутинската нега приспособете ја со новото секојдневје што ќе го живеете во 9-месечниот период. Лекарите алармираат, под влијание на хормоните, кожата на трудниците станува сензитивна и ранлива на сите надворешни елементи.
Најголемото прашање е што е дозволено да користат жените во блажена состојба? Бидејќи некои состојки што се наоѓаат во козметичките производи се апсорбираат преку кожата, а преку крвотокот доаѓаат во контакт со бебето.
Основни препораки:
СИГУРНОСТ
Тоа од што треба да тргнете е сигурноста на производите за плодот. Според неколку клинички студии, салицилната киселина, бензоил пероксидот, некои кремови за сончање, па дури и алое верата и витаминот А, се поврзуваат со несакани ефекти од нивното често користење.
БОРБА СО АКНИТЕ
Во текот на бременоста, кожата е посклона кон создавање акни, особено ако времето е топло. Но, лекувањето не смее да оди според стандардните техники. Купете си нежна маска за лице и лосион кој ќе биде на природна база или уште подобро направете си сами според домашен рецепт. Природната козметика е далеку поскапа, но дефинитивно без последици.
ИЗБЕГНУВАЊЕ НА ДАМКИТЕ
Хормоните на бременоста, естрогенот и прогестеронот ги прави клетките, одговорни за пигментацијата, многу почувствителни на сонце. На тој начин се создаваат темни дамки на делот околу брадата, образите, носот и челото. Ваквата појава е позната како мелазма и се јавува речиси кај 70% од бремените жени. Единствен начин да се заштитите е да го намалите изложувањето на сонце и да ставате крем со заштитен фактор минимум 25.
НАМАЛУВАЊЕ НА ЦРВЕНИЛОТО
Со самото забременување се забрзува циркулацијата на крвта. При крајот на бременоста, мајчиното срце пумпа речиси 50% повеќе крв, за разлика од претходно. Кај некои последиците се природен сјај, а кај други одвратно црвенило. За да го намалите црвенилото, најважно од сè е да останете смирена. Заборавете на жешките напивки, избегнувајте и супата да биде топла. Повремено освежувајте го лицето со минерална вода.
