Спортувањето ги задоволува потребите на кожата од ендорфин.
Стресот не носи ништо добро, а жените најмногу го мразат поради фактот што предвреме ги остарува. Но, од причина што е неизбежен дел од животот, ви преостанува да изнајдете начин со кој ќе го ублажите неговото негативно влијание.
Ако зборуваме за сјајна и млада кожа, тогаш удрете на него со спортување. Зошто? Кожата има потреба од ендорфин, 3-4 вежби се доволни за да ја задоволите дневната потреба. Ваквиот спортски режим за кожа во комбинација со здрава исхрана и квалитетен сон, несомнено ќе резултира со блескаво лице. Во случај штетата да е сторена, тогаш ви остануваат следните алтернативи.
ШТЕТА: сува кожа како резултат на хроничен стрес. Секојдневните дози на стрес го покачуваат нивото на хормонот кортизол. Кортизолот ја намалува способноста на кожата да ја задржува водата. Без влага нема сјај и еластичност.
АЛТЕРНАТИВА: избегнувајте парфимирана козметика за лице. Ниската pH вредност е доволна за да се спречи сушењето на кожата. Мијте го лицето со млака вода, премногу топлата ја отстранува сета мрснотија.
ШТЕТА: појава на брчки. Кортизолот влијае на зголемување на шеќерот во крвта, а со тоа се оштетуваат колагенот и еластинот на кожата. Вашето намуртено и незадоволно лице, ги напнува фацијалните мускули, а тоа води кон создавање брчки.
АЛТЕРНАТИВА: кремата што изобилува со антиоксиданси и ретинол го поттикнува создавањето на колагенот. Обидете се да се насмеете, ако ништо друго држете го лицето безизразно.
ШТЕТА: црвенило. Стресот го качува крвниот притисок, протокот на крв се зголемува, а тоа води кон ширење на капиларите. Нервозата носи моментално црвенило, но ако имунолошкиот систем е слаб, таквиот проблем може и да потрае.
АЛТЕРНАТИВА: консултирајте се со дерматолог, тој ќе ви препорача одлична крема за смирување на црвенилото што истовремено ќе одговара на вашиот тип на кожа.
ШТЕТА: акни. Повеќе од јасно е дека стресот ги поттикнува воспалителните процеси, а резултатот се одвратните акни, најчесто на Т-зоната.
АЛТЕРНАТИВА: користете лосион што содржи хлорамфеникол, салицилна киселина или бензиол пероксид. Ако производот нема ефект, обратете се кај вашиот кожен лекар.
