NotForMen

80% од проблемите со кожата се поврзани со затворањето на порите во текот на ноќта.

Со годините секоја жена усвојува одреден режим на нега. Сите ги знаат основните правила како: забрането е стискање на акните, но се уште постојат навики кои ја уништуваат женската убавина, без при тоа жените да бидат свесни за тоа.

Од тие причини решивме да создадеме еден центар за рехабилитација со цел да ги искорениме сите злосторства што и ги нанесувате на вашата кожа секојдневно. Разговаравме со жени од различни возрасти и ги замоливме да ги споделат со нас најголемите грешки што и ги причиниле на својата убавина. Останете со нас, можеби ќе се пронајдете во некоја.

ЗАБОРАВЕТЕ НА ДЕБЕЛИ СЛОЕВИ КРЕМА! - Симона

Читајќи разни правила по списанија и интернет, почнав редовно да нанесувам хидратантна крема на лицето. Наместо сјајна, добив масна кожа што стана склона на создавање акни.  Конечно се освестив и почнав да ја слушам сопствената кожа...сфатив дека немам потреба од крема на Т-зоната.

РЕГЕНЕРАТОРОТ (иако наменет) E СИЛЕН ЗА КОРЕНОТ - Снежe

По совет на мојата фризерка, регенераторот почнав да го нанесувам од коренот до врвовите. Косата почна да ми се масти за еден ден, но тоа не беше ништо во споредба со првутот. Кожата на главата почна буквално да ми пука. Сега се мијам само со шампон, а првото плакнење го правам со сварен чај од коприва. Природните маснотии на главата се доволни за сјај...маските и регенераторите ги ограничив на врвовите. Сметам дека премногу хемија не е добро за косата.

НЕПРАВИЛНОТО НАНЕСУВАЊЕ КАРМИН ВЛИЈАЕ НА БОЈАТА - Елена

Постојано ја критикувам мајка ми дека не знае да избере кармин од причина што не знае правилно да го тестира дали и стои. Имав прилика да слушам совети од странски мејкап артист и човекот навистина убаво објасни како се пробува кармин. Велеше дека се нанесува само на долната усна, не на двете. А во никој случај не смеете да ги протриете двете усни, бидејќи под дејство на циркулацијата карминот секогаш станува потемен.

ЧУВАЊЕТО НА МАСКИТЕ ПОДОЛГО ОД ПРЕПИШАНОТО МОЖЕ ДА БИДЕ ШТЕТНО -Лиле

На упатството убаво пишуваше: чувајте ја маската на лицето од 10 до 15 минути, а пото исплакнете го со вода. Но, јас надевајќи се на поголеми ефекти, ја оставив да стои цел час. Кожата ми се исуши и се појави големо црвенило. Едвај го смирив со гел од алое вера. Сепак, упатствата не залудно некој ги пишува.

КОЊСКОТО ОПАВЧЕ МОЖЕ ДА ПРЕДИЗВИКА ОПАЃАЊЕ НА КОСАТА - Ана

Бидејќи не си се допаѓам со пуштена коса дојдов до степен таа да почне да ми паѓа. Во ред е да носите коњско опавче, но не и секој ден. Јас сум пример дека постојаното затегнување на косата е штетно. Таа се прекршува, ја губи еластичноста и почнува да се ретчи во делот кај шишките. Многу подобра опција се шнолите и штипките за коса, отколку ластичето.

НИКАКО НЕ ЛЕГНУВАЈТЕ СО ШМИНКА - Ивана

Ќе се приберам дома во 4 часот наутро и нормално ќе си легнам во кревет оставајќи ја шминката на себе. Откако во едно истражување прочитав дека 80% од проблемите со кожата се поврзани со затворањето на порите во текот на ноќта (поради шминката), ако ништо друго, го поминувам лицето со влажни шамичиња. Митесерите значително се намалија.