Карактеристично за детските тумори е тоа што се агресивни, но затоа многу подобро реагираат на хемотерапијата и другите современи методи на лекување. Дечињата најмногу страдаат од леукемиите и мозочните тумори.
Денес ќе се запознаеме за три типа, кои не се толку познати помеѓу јавноста. Станува збор за:
Невробластома.
Неуробластомот се наоѓа на четврто место по честотата на јавување. На најголем ризик се изложени децата на 2 годишна возраст.
Една третина од неуробластомите се развива во надбубрежните жлезди, a другата третина во ганглиите на симпатичкиот нервен систем, најчесто во абдоменот. Преостанатите случаи на неуробластом се јавуваат во градниот кош, вратот или малата карлица. Некои форми на неуробластом започнуваат во коскената срцевина.
Wilms-ов тумор.
Најчест примарен малиген тумор на бубрегот во детската возраст. Преку 80% од туморите се јавуваат пред 5-тата година од животот. Ретко се сретнува после 10-тата година од животот.
Кај најголем број на, инаку претходно здрави деца, случајно се открива голема тврдина (тумор) во абдоменот на детето. Други симптоми кои може да се јават, но и не мора се: крв во мочката, општа слабост и малаксаност, покачена телесна температура или болка во стомакот.
Денес е можно излекување кај околу 80% од пациентите.
Ретинобластом.
Овој тумор е тумор на детската возраст и најчесто се дијагностицира во првата година од животот и претставува 2% од сите педијатриски малигни тумори.
Ретинобластомот е малиген тумор кој може да биде унилатерален (да се јави на едното око) или билатерален (да се јави на двете очи).
Најзначаен клинички симптом е т.н. мачкино око, односно бел ретинален рефлекс или леукокорија.
Други симптоми на ретинобластомот се: намален вид, страбизам (разрокост), инфламација.
