Замислете си по напорната недела да се отпуштите со масажа во некој центар. Нормално дека сопругот, момчето или пријателката секогаш се тука да ви помогнат со вкочанетите рамена, но друго е кога тоа го прави професионалец.
Не велиме дека масажите не се луксуз, за 45 минути ќе треба да платите 500 денари, но ќе излезете како преродена и не верувам дека ќе жалите ниту денар. Замислете си, легнувате на креветот, а до вас стои згодно момче што ве масира како програмиран. Само што си рековте ајде сега нека ме стисне малку на вратот и ете ги жилите почнуваат да попуштаат под неговите прсти...каково уживање.
Со оглед на тоа што времето е ладно, издвоивме три топли масажи (не дека не може да се практикуваат во лето) за релаксација и елан.
МАСАЖА СО ТОПЛИ КАМЕЊА
СТАНУВА ЗБОР ЗА...апсолутно отпуштање на телото и духот! Ова е нешто ново за фановите на масажата што веќе имаат искусено многу. Загреаните мазни камења се поставуваат на конкретни места, обично тоа се чакрите - енергетски центри. Топлината на камењата се пренесува на кожата и длабоко продира во неа.
КОГА СЕ ПРИМЕНУВА...оваа масажа најчесто се користи за воспоставување внатрешен мир и хармонија. Целта не е лекување некоја физичка болка, туку подобрување на психичката состојба. Докажано масажата со топли камења е ефикасна за ублажување на нервозата, анксиозноста, болките, па сè до подобрување на циркулацијата и другите тегоби како последица на секојдневниот стрес.
ДАЛИ ДЕЈСТВУВА...секој што подлегнал на овој тип масажа може да потврди дека таа отпушта, освежува и ја обновува енергијата во вас.
МАСАЖА СО ЧАШИ
СТАНУВА ЗБОР ЗА...кинеска традиционална метода во која се применува топлотна енергија. Името го добила поради тоа што масажата се прави со помош на стаклена чаша или тегла, а може и пластична. Чашата, наопаку, се поставува на болното место, а потоа се загрева одозгора за да се создаде вакуум. Со помош на ваквиот ефект кожата потекува, се поткрева нагоре за време од 10 минути. Откако ќе ја извадите чашата на кожата ќе остане црвен круг, но не грижете се, набрзо ќе исчезне сам по себе.
КОГА СЕ ПРИМЕНУВА...методата со чаши служи како терапија за болки во нозете, грбот, рамената. Исто така се покажала и ефикасна во третирањето на воспаление на белите дробови, астма, кашлица, особено кај децата. Многу често ја применуваат и спортистите при повреди и ублажување на воспалението на мускулите.
ДАЛИ ДЕЈСТВУВА...кај пациентите што патат од хронична истоштеност, по 12 терапии, масажата со помош на чаши видливо ја подобрила нивната состојба. Карактеристичните симптоми како дигестивни тегоби, пад на концентрација и постојаното чувство на замор, видливо биле ублажени.
МОКСА-ТЕРАПИЈА
СТАНУВА ЗБОР ЗА...моксата се користи за загревање на телото, ефектот е сличен како масажата со топли камења. Моксата е всушност див пелин што најчесто се става на прстите со цел да се забрза циркулацијата.
КОГА СЕ ПРИМЕНУВА...Кинезите ја применуваат мокса-терапијата со цел да ја обноват внатрешната енергија во телото (ЧИ). Но, оваа терапија се покажала исклучително ефикасна во ублажување на болките, како и во превенција и лекување на многубројни дигестивни и респираторни тегоби. Особено е ефикасна во ублажување на болките во вратот и рамената, како и главоболките што настануваат како последица на овие болки.
ДАЛИ ДЕЈСТВУВА...според кинеските истражувања, двонеделната терапија ја подобрува подвижноста на ембрионот, така што на природен начин е овозможено негово поместување во нормална положба, тоа значително го олеснува породувањето. Освен тоа, истражувањата покажуваат дека моксата е делотворна терапија и во други случаи, особено кога медикаментите се покажуваат како неделотворни.
