Додека учите ќе паѓате и тоа многу, но не дозволувајте тоа да ве премисли да продолжите понатаму
Полека, но сигурно времето се стоплува. Пред да се освестите надвор ќе пука сонце, а вие нема да можете да се поместите од креветот. Затоа кренете го задникот, имаме брилијантна идеја за вас! Што велите да почнете да лизгате на мраз? Ние велиме дека не треба да се мислите, еве зошто:
- Конечно ќе можете да се забавувате и на ладно време.
- Ќе имате мотив да го поканите момчето на поинаков состанок.
- Ќе го размрдате залежаното тело.
- Ќе ги согорите калориите што ги внесовте во текот на денот.
- Ќе добиете женствен изглед на нозете и грациозно држење на телото, како професионалните лизгачки.
Лизгањето на мраз е всушност зимско возење на ролери, значи тие што летно време практикуваат да возат, не би требало да имаат проблем да ја совладаат истата техника на мраз. Останатите со малку волја и труд ќе успеат да се одржат на мразот за помалку од 3 посети на лизгалиштето.
КАКО СЕ ЛИЗГА НА МРАЗ:
(нашите насоки се во функција да ви помогнат и да ве поттикнат полесно да го совладате овој спорт, но губите време ако само останете на читање совети. Стапнете на мразот и часот ќе започне сам по себе.)
| 420 калории за само еден час се губат при лизгање на мраз |
ЧАС ПО БАЛАНС - не можете да очекувате дека ќе лизгате како професионалец од првото стапнување на мразот. На првиот час доволно е да научите да стоите и да одржувате баланс.
ЧАС ПО ВЕРБА - верувајте му на мразот, во буквална смисла. Клучот на лизгањето е во отпуштеноста и вербата во мразот. Едноставно замислете си дека стоите на асфалт.
ЧАС ПО ОДЕЊЕ - можеби ќе ви звучи смешно, но одењето по мраз е единствениот начин за да ги тренирате колената да одржуваат баланс. Не се држете со рацете за оградата, ставете ги на половина, одете напред и малку поднаведнете се со колената.
ЧАС ПО ЛИЗГАЊЕ - откако добро ќе ја совладате техниката на одење, што значи веќе сте го нашле центарот за гравитација на мразот, постепено забрзувајте и почнете да лизгате со нозете дијагонално. Имајте човек до себе што ќе ви помогне привремено да се потпрете.
ПОТРЕБНА ОПРЕМА:
Лизгалки, задолжително шлем за почетници, комотна и топла облека за да можете лесно да се движите, заштитници за колената и најважно од се ПАРТНЕР што има желба да учи како вас. Запомнете: додека учите ќе паѓате и тоа многу, но не дозволувајте тоа да ве премисли да продолжите понатаму.
