NotForMen

Хепатитис е вирусна инфекција на црниот дроб позната како жолтица. Зборот Хепатитис означува воспаление на црниот дроб (хепарот) кое може да биде причинето од најразлични фактори: вируси (Hepatitis A/B/C/E...), токсични супстанци (лекови, алкохол), автоимуна реакција на организмот, како и од други болести. Користењето на дроги, како што се екстази, хероин и кокаинот исто така го оштетуваат црниот дроб. Црниот дроб понекогаш го нарекуваме хемиска лабораторија на нашиот организам.

Познати се повеќе видови на вирусот на хепатитис од кои сексуално се преносливи тип Б и тип Ц. Заштитениот сексуален однос е неминовен во борбата против овој вирус.

Начин на пренесување

Типот Ц се пренесува преку: крвен пат (употреба на користени игли, шприцеви, нестерилни инструменти за тетовирање, пирсинг, трансфузија на крв и слично), незаштитен сексуален однос, од бремена жена на плодот во текот на бременоста.

Хепатитис Ц вирусот не се пренесува преку плунка, воздух, вода, храна и социјални контакти (гушкање, бакнување во образ, ракување...)

Симптоми

Многу лица немаат симптоми, но доколку се појавата, најчести симптоми се: знаци на настинка, умор, гадење и повраќање, пролив, намален апетит, губење на тежина, жолто пребојување на кожата и белките на очите, чешање на кожата, темна боја на урината. Се открива преку: лекарски преглед и со посебни крвни тестови.

Хепатитис Б може спонтано да помине или со соодветна терапија да се излекува без последици, но хепатитис Ц и покрај современите трендови на лекување, кај 75-85 проценти од инфицираните преминува во хронична форма со трајни оштетувања на црниот дроб (цироза или рак на црниот дроб).

Интересни факти

Во Македонија околу 30.000 лица се инфицирани од Хепатитис Ц според Институтот за јавно здравје на Македонија. Со заразата најчесто е зафатена популацијата на возраст од 19 до 29 години. Проблемот за ширење на оваа заразна болест лежи во ненавременото лекување, кое во просек во Македонија трае 6 месеци.

Само исклучително мал дел од луѓето инфицирани со Хепатитис Ц вирусот успеваат да ја победат до крај инфекцијата.

Третманот за Хепатитис Ц не е доживотен и обично трае 24 до 48 недели. Обично 3 антивирусни лекови се прифатени (одобрени) во лекувањето на оваа инфекција.